政壇：天價會計師 頂薪五千萬
會計師公會今年七至八月做咗個會員調查，發現喺上市公司做高級管理層或董事嘅公會會員人工都幾和味！喺調查入面，最高薪嗰位年賺五千一百萬元。當除開十二個月計，即係月入四百二十五萬元o架！
會計師公會會長何超平（右）同CEO丁偉銓齊齊出嚟講吓佢哋呢行對上市公司幾咁緊要。
年賺五千一百萬元嗰位係邊位？調查當然唔會玩開名。不過，會計師公會行政總裁丁偉銓就估計，呢位打工皇帝可能已經唔係財務總監，而係CEO（行政總裁）。
調查仲發現，當中兩成三人喺上市公司擁有過百萬元年薪，同時，八成七在港上市公司都有佢哋公會會員做公司高層或董事局成員。咁即係？即係足以證明會計師喺本港資本市場有好大影響力咁囉！
