政壇：港產動畫奪獎 Greg蘇失禮人前

香港嘅創意文化獲得肯定，唔知蔡冠深覺得政府應該如何做得更好？點知佢聞言苦笑，似乎唔想多講，只係話得獎當晚已立刻將好消息通知主管創意產業嘅商務及經濟發展局局長Greg蘇錦樑，但至今仲未收到祝賀嘅電話。

商經局回覆時承認阿Greg上周六晚收到有關訊息，但收到之前，已第一時間喺社交網站Facebook（fb）恭賀有關得獎電影。其實禮貌上覆個電話，甚至打幾個字覆個短訊，都唔係用太多時間，若只係透過fb留言當回覆，似乎欠缺禮貌同誠意，更令人覺得阿Greg只係透過fb做門面工夫。

蔡冠深泵水逾億 蝕做獲回報

有「海產大王」之稱嘅蔡冠深家族企業新華集團，喺十年前原來已另成立新華傳媒從事電影發行同投資等一條龍業務，呢次獲獎嘅作品係第三部投資嘅同類動畫影片。蔡冠深話多年嚟已累計投資逾億元，但票房並唔理想，一直係蝕住做。

雖然蝕錢但仲堅持投資，係因為麥兜呢隻小豬體現本土情懷，亦反映咗小市民嘅真實生活。戲中小豬常面對逆境，但總係唔放棄、自力更生，追求快樂人生，充分凸顯咗香港精神。佢話今次入圍金馬獎，同票房高逾九億元嘅內地動畫片直接對壘下，冇諗過竟然勝出，印證呢隻小豬並唔簡單，佢嘅一番苦心冇白費，亦係香港嘅光榮。