區議會選舉塵埃落定,埋單計數,新民黨喺今次區議會選舉派出四十二人參選,但只贏得二十六席,議席少過上次選舉,仲要當年新民黨同公民力量未結盟添!可能輸得太慘烈,搞到主席葉劉淑儀都變咗「慌失失奇兵」,口窒窒不斷講錯嘢,一向威開嘅葉劉今次真係失晒威喇!

連環講錯激進政黨

話說葉劉喺記者會講到,今次選舉無人用佔領行動做議題,而嗰啲積極參與「拉布」同佔領、最激烈嘅政黨,區議會選舉成績都好差,舉例話公民力量同社民連。公民力量係新民黨嘅盟友,當然唔會積極「拉布」同佔領啦,相信葉劉當時係想講人民力量,但就講錯公民力量。

葉劉都好醒目,兩分鐘後就發現自己可能講錯嘢,即刻話要再補充少少,話剛才讀錯咗,舉例話「人民力量、街工,唔係,人民力量、熱血公民、社民連」,又再次講錯。

葉劉喺政界打滾咁多年,有乜嘢大場面未見過吖,睇嚟今次選舉成績真係嚇到佢有啲亂,不斷失言。

佢又話今次選舉可能反映香港整體都有啲不滿情緒,好多中產有新諗法,新民黨都要研究吓,但該黨喺中產區仍然有好多票,只係下一輪選戰要努力爭取更多選民支持。

第一手消息請下載on.cc東網iPhone/iPad/Android/Windows Phone Apps