政壇：高達夫妻檔 輸開有條路
歷屆區議會選舉，都不乏夫妻檔、父子或父女檔齊齊出選，但每次都有人歡喜有人愁，未能如願齊齊當選，當中以白鴿黨「高達」李永達同阿Tree陳樹英呢對夫婦最經典，高達四年前喺葵青區議會荔華區敗選，到今屆區選，太太阿Tree都步老公後塵，得票低過建制派對手，失去屯門區議會兆康選區議席。
建仔都有家庭檔參加區選，但有得亦有失，好似今屆自動當選嘅北區區議員劉國勳，上屆以四千七百多票成為「票王」，可惜佢老婆呂廸明連續兩屆參選落敗。此外，由九一年當選至今嘅資深屯門區議員陳雲生，今屆「老貓燒鬚」輸畀工黨副主席譚駿賢，相反其妻龍瑞卿就順利自動當選屯門區議員。
同樣係建仔嘅梁偉文，連任多屆葵青區議員，今屆再度同女兒梁嘉銘父女兵上陣，再加埋初上陣嘅「八十後」兒子梁崗銘，一家三口齊出戰葵青區，成為地區一時佳話。
莊榮輝高永聯四連敗
不過，最終三個只能活一個，當中只有梁偉文成功連任。梁嘉銘○七年起出戰葵青興芳選區，三度挑戰白鴿黨吳劍昇但三連敗，當中以今屆輸得最少，僅以七十二票之差落敗，睇嚟都係冇選舉運。
區議會選舉仲有多名屢戰屢敗、四年輸完又四年嘅「區選黑仔王」。當中最經典嘅係白鴿黨莊榮輝同工聯會高永聯，至今已連輸四屆，極可能係參選最多屆區選而又從未贏過嘅候選人。
莊榮輝早喺○三年參選中西區堅摩選區，當年以八票之差落敗，四年後喺同一選區以一百五十票落敗。一一年佢轉戰西環選區，再以二十四票之差落選，今屆喺同一選區再戰同一對手建仔嘅張國鈞，以約一百票之差落選。高永聯就係由泛民主派轉往建制，但都未能令佢當選，佢早喺九四年以民協身份參選西貢景林選區，惟三度落敗，至今年復出轉戰澳唐選區，以約八百票落敗。
