全球暖化，氣候異常，香港踏入十一月中依然炎熱。不過旅遊業就唔同嘞，早就步入寒冬，而且唔知幾時至見到盡頭，都咪話唔惆悵。

當局有乜辦法呢？話要加強宣傳推廣喎。嗱，旅發局今年再次舉辦「香港繽紛冬日節」，推出多個吸客項目，包括主題聖誕燈飾、大型除夕倒數同3D光雕匯演等，海外推廣金額超過二千一百萬元，比去年多一倍，可以講係不惜工本。當局聲稱未來宣傳以優質旅遊為主力，專攻內地及短途市場，特別會喺華北及東北等地區加強宣傳，希望吸引更多過夜客咁話。

即係咁，成功嘅宣傳係商品嘅名片，旅遊業陷入寒冬，當局搞噱頭吸客，冇人會反對，要加碼宣傳，亦無可厚非，但必須有成果至得，否則盞浪費金錢嘅咋。大家應該記得，當局早前斥資八千萬元推出「香港FUN享夏日禮」，錢就使咗，結果旅客冇顯著增加，姿勢大於實際，今次會唔會又係咁呢？如果花咗公帑但冇效果，搞嚟又有乜意義呢？

唔係潑冷水，港產官僚得過且過，吸客隨時變趕客嘅咋。呢，港府九月推出連串旅遊業救亡計劃，包括向旅發局撥款一千萬元公帑，推出「旅遊景點海外推廣宣傳配對基金資助計劃」，並於本月批出十個旅遊景點申請，點知劣評如潮，旅發局負責嘅旅遊宣傳短片平平無奇，缺乏創意，同外國宣傳片差天共地，咁又點可能吸引旅客吖？

最好笑嘅係，話明係推廣計劃，本來應該幫助知名度唔高嘅景點開拓市場，點知十個獲資助嘅景點都係人人熟悉嘅大景點，好似迪士尼樂園同海洋公園咁，使乜港府宣傳吖？需要宣傳嘅景點唔宣傳，唔需要宣傳嘅就亂使錢，唔係浪費公帑又係乜吖。

話時話，受到訪港旅客減少、消費模式轉變，同埋激進組織趕客等不利因素影響，本港旅遊業正陷於四面楚歌之境，港府宣傳推廣求求其其，何止係浪費公帑，簡直係倒米添吖。難為港產官僚仲自吹自擂，成日話要吸引高端旅客訪港，其實，當局無能醜態已經係一種負面宣傳喇！

歸根究柢，旅遊業問題多多，激進組織已經嚇走唔少旅客，加上黑店劏客，甚至搞出人命，香港臭名遠揚，港府對呢啲亂象闊佬懶理，香港遲早變成生人勿近嘅禁地，點樣宣傳都係嘥錢嘥時間，叮！