政壇：未接掌港鐵 肥亨先派高帽
仲有個幾月，前高官「肥亨」馬時亨就正式上任港鐵公司董事局主席，咁啱尋日見佢現身港鐵中環站，莫非上任之前提早視察港鐵業務，為上任主席做好準備？肥亨就話只係路過啫，但佢提到早前曾到訪上海，見識過當地嘅地鐵，但覺得光線昏暗，又唔乾淨，兼且車站內仲有小販擺地攤，好明顯上海地鐵不及港鐵喇！
馬時亨話見識過上海地鐵之後，深感港鐵實在好優秀。
肥亨又話莫講話上海，就算同倫敦、紐約、巴黎、東京呢啲大都會相比，港鐵亦都毫不遜色，就連事事都要同香港一較長短嘅新加坡，佢哋掌管運輸嘅官員亦盛讚港鐵嘅營運做得好好，值得借鑑。至於近日發生嘅攜帶大型樂器風波，肥亨就話每間公司都有本身嘅規矩，因此，乘客所攜帶物品無可能全無限制，而港鐵已經就此訂立新規定，試行幾個月之後，再檢討成效。
