話說申訴專員公署即將到立法會匯報工作，申訴專員Connie劉燕卿尋日出席活動時話，佢同團隊會做足準備，解答議員提問，佢又特別講到，有啲投訴人以為申訴專員係能醫百病嘅萬應靈丹，但其實申訴專員絕非能人所不能。唔通佢怕應付唔到議員嘅質詢，所以咁快戴定頭盔？

劉燕卿

Connie話申訴專員唔係萬能，而係通情達理，唔會過分嚴苛或諸多挑剔，相反，同人打交道時，要盡可能心平氣和，設身處地考慮對方嘅情況，即係要秉持公平公義，以中庸之道待人。

佢又話過去嘅經驗令佢體會到，做人做事要恰如其分，過分進取易招損，流於被動，就會被視為「不作為」，點樣平衡兩者，做到不卑不亢，事實上唔易做到，唔少人唔清楚或唔願意承擔責任，就會出現亂子，而公署嘅角色，就係撥亂反正，幫政府部門同公營機構做「體檢」。咁講法，公署唔係似萬應靈丹，而係似醫生多啲，唔知有冇部門係醫番都嘥藥費嘅呢？

第一手消息請下載on.cc東網iPhone/iPad/Android/Windows Phone Apps