政壇：鄧鉅明夫婦 享受遊車河

太子珠寶鐘錶主席鄧鉅明夫婦尋晚一齊出席「全新BMW 7 Series」晚會，鄧生透露平日愛駕駛，但大多數時候由司機駕駛，鄧太就認為夫婦二人遊車河，係好恩愛嘅表現，更即向鄧生笑謂：「寶馬嘅車我都鍾意，好好坐，你快啲set個時間（遊車河），今晚買埋架跑車。」鄧太話喺九八年已考獲車牌，但已十幾年冇駕駛。此外，快將生日嘅佢，被問到點樣慶祝時，佢自言平日經常外出晚飯，所以生日反而會留喺家中，一家人靜靜地吃餐飯。鄧生聽罷，即稱讚太太話：「好老婆！」鄧太就鬼馬地笑說：「慳一餐飯，可以買架車，哈哈！」二人即場打情駡俏，溫馨又搞笑！