政壇：搞搞政：盲撐中大生 沈祖堯詐傻
各大專院校衝擊風波不斷，先有港大學生佔領校委會會場及禁錮校委事件，又有嶺大學生圍堵校董會。但尋日中大畢業禮就出奇地平靜，無人搗亂，中大校長沈祖堯於是做「保長」，喺典禮致詞時，話或者有部分人認為現今大學生比唔起以前，「有啲吵吵鬧鬧、不懂禮節、不思進取」，但佢認為中大學生唔係咁樣，對於呢啲指控，亦唔能夠以偏概全。
寄語努力工作少投訴
咦！沈祖堯係咪忘記咗中大十月開校董會時，約十名學生會成員踩場示威，要求列席會議，又要求在場校董逐一表態，仲一度以「圍堵會場」作要挾，堅持要列席，雖然其後入內作非正式交流，但仍令校董會押後推選候任主席。如果呢件事都唔算吵鬧、不懂禮節，莫非要嚴重到好似港大禁錮校委先算係？莫非佢蒙住雙眼盲撐中大學生？
但佢其後用英文致詞時，都有警惕班畢業生，提醒佢哋即將成為社會一分子，希望佢哋努力工作，減少投訴，因為沒建設性嘅批評，對個人、家庭同社會都冇好處，不斷爭論，亦唔會令到世界變得更好。佢又話中東戰爭、巴黎恐襲同香港近日嘅事情都係例子，證明黑暗唔能夠驅散黑暗，仇恨唔能夠醫治仇恨，只有以光明取代黑暗，原諒取代仇恨，先能夠實現和平。既然沈祖堯將班畢業生捧到上天，點解忽然又對佢哋嘅將來欠缺信心呢？
