政壇：邱副玩失蹤當食生菜
仲記得運輸及房屋局副局長「邱副」邱誠武喺○八年底因處理的士短加長減問題，被立法會議員梁耀忠踢爆唔覆新界的士司機權益大聯盟主席嘅電話，仲要反問梁耀忠「你威脅我呀？」結果激嬲班的士大佬，搞到的士堵塞交通收場，最終要時任局長鄭汝樺出面解畫，同埋向聯盟主席「耍冧」。點知事隔多年，佢竟然舊「病」復發喎。
汲水門撞橋事發當晚，大家都好擔心機場變孤島，又唔知有沒有加班船往返，又唔知機場快綫何時恢復通車。原來當晚有議員曾經打電話聯絡邱副，查詢交通安排詳情，點知邱副全晚冇影，到翌日要勞煩局長張炳良回覆。又有議員投訴，喺鉛水事件中，曾問過邱副有關驗水事宜，結果又係張炳良回覆。
邱副唔單止大事無回覆，小事亦不作跟進。最近有個投訴人，曾就地區事宜搵邱副處理，佢應承會跟進，但過咗兩個月都無回音，再追問下，邱副又話會跟進，再過幾個月，原來佢嘅下屬已代為處理，但邱副完全無回覆投訴人，激到投訴人發火。到底邱副平時做乜嘢呢？真係一個謎，睇嚟佢份人工都幾易賺喎。
辯稱同事間已作分工
邱副回覆查詢時話，汲水門撞橋事件發生期間，有好多電話往來，部門內嘅同事都需要了解事件，無可能即時回覆議員。至於鉛水事件上，當局有聽取各黨派嘅意見，其後亦有採納意見。佢又話同事之間有唔同分工，由邊位同事回覆議員電話，係局方嘅安排。至於地區事宜方面，佢自稱日常收好多類型嘅查詢，而地區議題應由地區部門去處理，唔係樣樣都係政策局去做，有時由前線部門處理較恰當。
被問到點解冇回覆投訴人？邱副則指最重要係已處理事件喎。不過，件事並非佢處理，如果連回覆投訴人都懶，其實佢可有可無喇！
