香港人好美食，一年四季無火鍋不歡，三五知己一邊飲飲食食，一邊吹吹水，確係人生一大樂事o架。不過咁，正所謂利口不利福，火鍋食物高鹽多油唔使多講啦，查實被認為消滯解渴嘅酸梅湯及竹蔗水，飲得多一樣唔健康o架咋。

唔係誇張o架，消委會與食安中心測試逾百款來自中式食肆、火鍋店及茶餐廳等非預先包裝飲品嘅糖含量，發現有三成樣本屬於高糖分飲品。其中一款凍山楂茶嘅糖含量仲爆晒燈，只要飲多過一杯，已經超出世衞建議每日糖分攝取上限，等於不知不覺食幾羹糖落肚，呢啲咪叫「糖衣陷阱」囉。

咪以為淨係非預先包裝飲品勁多糖，包裝飲品都唔好得幾多o架咋。呢，消委會發現包括普通配方菊花飲品、竹蔗飲品、薏米飲品、雪梨飲品及酸梅湯等五款包裝飲品，平均糖含量都高過食肆非預先包裝飲品，所謂健康飲品，隨時愈飲愈唔健康，都咪話唔諷刺呀。

冇計啦，港人飲食習慣向來重口味，再加上唔少食肆推出任飲任食服務，消費者唔肯節制，鹽糖攝取量想唔超標都幾難。咪話危言聳聽呀，正如營養專家話齋，經常進食高鹽高糖高油「三高食物」，分分鐘會引致心臟病、中風及癡肥，問你怕未！

有人問，港府早前成立「降低食物中鹽和糖委員會」，唔係應該諗諗辦法對症下藥咩？無錯，呢個委員會話就話為減鹽糖而設，但一早講明只係希望市民「唔知唔覺」少食鹽糖，強調絕非「管束」飲食業界，換句話說，即係唔止係政治花瓶，直頭係無牙老虎呀。

講到底，港產官僚出晒名懶到出汁、廢到無倫o架啦，靠當局監管盞嘥氣嘅啫。所以呢，飲品食品固然懶監管，連問題美肌產品一樣長驅直入呀。嗱，台灣當局日前就進行查核，發現當地二十五種市售面膜商品，超過半數標示唔合格，其中八件仲涉及誇大不實，限令業者整改及罰款。

弊就弊在，呢啲品牌嘅產品喺香港有售，而且廣受女士們追捧添，如果唔係台灣當局踢爆，港產官僚仍然蒙在鼓裏，女士們搽咗無宣稱嘅抗老化功效事小，搞到敏感變豬頭毀容事大呀。

計太一叮話齋，信官不如無官，求人不如求己。唔理揀飲擇食抑或挑選化妝品，睇清睇楚標籤上嘅成分含量，做個精明嘅消費者，自求多福好過啦，叮!