城中鏡：熱出商機
零售市道前景暗淡，舉例指化妝品等銷售額都錄得下跌，但部分貨品仍持續好賣，早前喺賽馬日舉行「樂聲盃」，代理日本電器起家嘅信興集團主席David蒙德揚話，個別產品銷售情況仍然唔錯，例如風扇同冷氣機。香港早排先經歷七年嚟最熱嘅立冬，估唔到天氣熱，都可以對售賣電器嘅公司帶來一絲希望同暖意。
蒙德揚（左）話風扇同冷氣機銷情唔錯，旁為太太園田惠美。
姚珏（右）話老公魯恭以前都有唱歌劇。
梁智鴻（左）同盧寵茂齊齊現身馬場。
日前喺沙田馬場遇到David，講起零售業市道，佢話雖然零售業近來冇乜增長，但都有個別電器產品例外，好似冷氣機、風扇等，銷售額就一路都幾好，估計可能係同天氣熱有關。現場所見，佢呢排好似清減咗，話因為要準備跑馬拉松，所以減緊磅，最近先瘦咗兩公斤。
姚珏驚嗌交唔教女學琴
同場仲有著名小提琴家姚珏同佢老公魯恭，原來姚珏兩名女兒已經亭亭玉立，仲遺傳咗媽媽嘅音樂天分，小提琴同鋼琴都已達到演奏級。不過，姚珏話自己只係教兩名女兒至初階程度，佢哋十幾歲時就冇親自教嘞，自言太過嚴格，平時教自己學生都好惡，所以唔教女兒，費事嗌交，不過女兒喺演出前都會請教佢，佢當然唔會吝嗇。另一方面，唔講唔知，魯恭以前都有唱開歌劇，但姚珏就話對方怕醜，只會唱畀自己聽喎。
本月初卸任香港大學校務委員會主席、人稱「金刀梁」嘅梁智鴻，當日聯同港大醫學院教授盧寵茂齊齊入馬場，現場所見金刀梁精神奕奕、笑容滿面，唔知係咪唔使再處理港大事務，所以成身都鬆晒呢？
