政壇：新股潮興父子檔上陣

孫主席自己有超過四十年家庭醫學服務經驗，仲係香港家庭醫學學會嘅創辦院士添，佢位公子Michael今年三十七歲，係放射科專科醫生，Michael話細細個已想做醫生，係受爸爸（即是孫主席）影響，覺得醫生可以幫到人。

咁Michael想唔想下一代都做埋醫生呢？佢有少少尷尷尬尬話「睇佢哋個人Preference啦」。咁爺爺孫主席點睇？爺爺話唔限住個孫做醫生，事關佢哋先得五、七歲，要睇佢哋興趣、能力同埋機會，爺爺仲話「Hong Kong U （醫科）好難入o架，Full Mark先入到」。

唔單止港企，內地民企一樣一、二代拍住上。本周五上市嘅福建零食王達利食品，佢哋主席許世輝位千金許陽陽，就係公司執董兼副總裁，呢位未來女當家今年三十二歲。

至於尋日開始招股嘅福萊特玻璃，佢哋主席阮洪良位二十八歲千金Michelle阮澤雲，就係公司財務總監，五年前已入公司管數，佢話好細個就跟阿爸阿媽返公司，所以公司算係佢「成長伴侶」。不過，Michelle其實已經有咗人生伴侶，就係老公趙曉非，亦即係集團副總經理。