政壇：阿里前CEO話即食麵最創新

Savio依家主要幫內地中小企做諮詢，時不時都會有啲想創業嘅年輕人搵佢傾吓咁。有次，有位北京年輕人想問吓佢嘅意見，仲約好咗一個星期五由北京飛嚟香港見佢，見完就即日飛返北京。對方話當日搭三點半機，佢當時預咗對方六點半到香港，可以食晚飯傾，食完對方就飛返北京。

點知，對方嘅狂熱程度勁到Savio覺得「不可思議」，事關呢位「狂熱分子」搭嗰班機，無錯係三點半，不過係凌晨三點半，即係晨早六點幾就到香港，「狂熱分子」原來係預算同Savio一路傾到傍晚先走，即係諗住傾足十二粒鐘。

Savio見佢咁有心就陪佢一齊狂熱，Savio自己專登早一日去機場酒店瞓一晚，晨早六點幾就可以同「狂熱分子」食早餐，一路傾餐飽。

講起創新，Savio覺得佢生命中最創新嘅嘢係乜？估唔到，竟然係即食麵！佢話加熱水就可以解決到一餐，好方便好勁。但佢都話「昨日嘅創新，就係今日嘅常規」，所以好多嘢唔可停喺度o架！