嚟緊周三掛牌嘅創板股中國創意控股，喺內地做節目製作嘅趙薇都入股做佢哋基礎投資者，究竟趙薇睇中佢哋啲乜嘢呢可？

聽聞趙薇周三會親身到場撐中國創意首掛，係真唔係呢？

收到風，聽講一切皆因為趙薇同中國創意位主席楊劍識於微時，早喺「環珠格格」年代就係老友，趙薇知道老友間公司上市，所以咪撐囉。

咁雲鋒基金創辦人虞鋒呢？就咁嘅，聽講趙薇同虞鋒亦好熟，所以一拍即合，虞鋒又做埋基礎投資者咁囉。

趙薇同虞鋒今次各自認購五千幾萬股，各佔股權百分之四點五，都只係各自拎二千一百零六萬蚊出嚟，對比佢兩位嘅身家，真係濕碎過濕碎。不過，聽講周三嘅掛牌儀式，趙薇有百分之九十九點九九機會現身撐場喎。若然親身到，咁又唔同喇，又睇過。

第一手消息請下載on.cc東網iPhone/iPad/Android/Windows Phone Apps