政壇：搞搞政：大輝咬實吳得掂 隔空駁火無寧日
立法會教育事務委員會主席林大輝同教育局局長「吳得掂」吳克儉嘅隔空駁火沒完沒了，早前就安排全港性系統評估（TSA）公聽會時間針鋒相對，吳得掂被追問下自爆本月底因私人理由離港未能出席，吳得掂之後曾另行建議另一個日子，暫時仍未有共識。其後戰線又延伸至吳得掂嘅出席率爭議，當時吳得掂稱，自己上年度嘅委員會會議出席率係百分之百，大輝則以「議案出席率」計算挑機，批評吳得掂嘅議案出席率僅約一半，吳得掂則透過新聞秘書再反擊，強調「事實勝於雄辯」，又翻查資料踢爆大輝上年度缺席兩次會議，疑似暗寸大輝有口話人無口話自己咁。
製TSA 23條狙擊
最新一役再由大輝發炮，佢趁聽日大會提出書面質詢炮製TSA「廿三條」，清一式提出同TSA有關嘅問題，基本問題當然唔少得，例如過去三年有無檢討TSA成效，另外最少有兩條專門對準吳得掂，一是吳得掂會唔會更改其行程以便出席公聽會，直接聽取持份者意見，另一是吳會否出席教育委員會下月五或六日舉行另一場公聽會。
對於TSA廿三條嘅狙擊，吳得掂無可避免繼續要硬食接招，聽日將要一次過書面回覆。唔知吳得掂會唔會畀大輝玩殘，抑或會長篇大論逐點回應，甚至爆發新一輪筆戰，大家就要拭目以待嘞！
另外，針對吳得掂未有出席本月九日討論「資助院校校監和其管治團體成員之組成及產生方法事宜」，據知大輝最近再去信吳得掂，要求對方出席討論此議題，並開列三個會期予吳得掂選擇，包括下月十四日、明年一月十一日及二月一日，今次雙方終於達成少少共識，吳得掂回覆指明年一月十一日先可出席會議。話時話，今次雙方總算開會有期，似乎吳得掂唔完全滿足各方訴求，會繼續成為各方炮轟嘅目標。
