爆完一單又一單，甩漏不盡嘅香港郵政被政界中人踢爆又「甩轆」。有建制派議員尋日喺立法會一個事務委員會會議上爆料，話接獲有候選人投訴，喺寄出免付郵資郵件時，因為郵件內容有多張同其他人嘅合照，被郵政職員要求證明合照人士同意支持該名候選人，質疑香港郵政點可以做埋選舉主任嘅工作，有人更批評，香港郵政至今仍未就今次事件道歉。香港郵政咁搞法，變相為選舉事務處嘅工作「倒米」。

有建仔中人透露，該黨上月底寄郵件嘅時候，被郵政職員要求出示支持同意書嘅副本，或要候選人簽署聲明書，佢哋基於有關條例未有相關規定，因此向選舉事務處投訴，處方表明會通知郵政唔使咁做。及至本月初，建仔再寄出同類郵件時，郵政職員仍然要求要先簽聲明書，佢哋只好再向選舉事務處投訴，據引述處方話郵政高層知道呢個情況，但前線人員仍然未掌握，會再通知郵政，事後幾經波折先至能夠寄出郵件。

遭質疑內部訊息亂

選舉事務處總選舉事務主任李柏康回應話，經了解事件後相信，涉事職員有少許誤解同太熱心，形容為一番好意提醒，當局已同有關職員溝通，相信已解決事件。

不過，有人熱心係一回事，做多咗疑越權又係另一回事，再加上香港郵政喺今次事件疑被質疑內部訊息混亂，香港郵政署長丁葉燕薇難辭其咎，佢究竟點樣做管理o架？郵政真係甩漏停不了，被嚴正整頓似乎係遲早嘅事！

第一手消息請下載on.cc東網iPhone/iPad/Android/Windows Phone Apps