潮流興「山系」，唔少市民鍾意三五成群行山露營，遠離煩囂，享受大自然，確實係賞心樂事。可惜吖，香港郊野公園嘅指定營地數目有限，每逢周末假期即出現逼爆場面，唔少人焗住要「越界」露營，搞到亂象叢生，危機四伏。

唔係誇張㗎，本報記者去多個指定營地睇過，到處人山人海，帳篷密密麻麻，簡直水洩不通。好似梅窩貝澳營地咁吖，由於指定範圍一早爆滿，遲來者索性喺欄外嘅非指定營地紮營，仲以帳篷作雜物房放置衣物、金屬支架及繩索。話時話，露營無非想清靜吓啫，家陣仲墟冚過街市，唔止掃興，簡直攞苦嚟辛添吖。

唔講唔知，喺郊野公園非指定營地違例露營隨時被檢控，最高可被判罰款二千元及監禁三個月，都咪話唔大鑊。之不過咁，喺非郊野公園範圍就完全無王管，唔少露營友利用法例漏洞，另闢蹊徑，直踩其他山頭。好似新興郊遊點大嶼山大東山「爛頭營」一帶，部分地方唔屬於郊野公園範圍，唔受法例規管，最近深受露營友歡迎，成為熱門「打卡」勝地，因此引發唔少亂象。

現場所見，好多露營友唔止紮營，仲自攜煮食工具生火煮食，佢哋話就話會好小心，但不怕一萬，最怕萬一，稍有不慎，隨時引起山火，咁就唔係講笑喇。當年八仙嶺山火釀成五死十三傷，相信大家記憶猶新；而今年初之嘛，南韓仁川海邊一個營地發生火警亦奪去五條人命，問你怕未。

係人都知，郊野公園佔香港約四成土地，本來有大把好去處，點知漁護署僅劃出四十一個指定營地，根本係浪費天然資源。尤其係近年露營熱潮方興未艾，當局唔識得與時並進，始終唔肯增加露營地點，逼市民鋌而走險違法露營，簡直豈有此理。

好多人諗極都唔明，當局計劃將部分郊野公園改為興建房屋，就畀人話「盲搶地」啫，但增加露營地點，令更多人接近大自然，人人舉腳贊成，而且唔使好多資源，只要提供水源及廢物處理就可以，點解漁護署連咁簡單嘅事都唔肯做呢？講到底，呢啲就係官僚主義作怪囉。

所以話，港產官僚懶到出汁，得過且過，因循苟且，旨意佢哋以民為本，都係嘥氣㗎喇。計太一叮話齋，大家行山露營最緊要自求多福，散心還散心，千祈要遵守法例，注意安全，以免樂極生悲吖。