香港律師會同廣東省、澳門及台北當地嘅律師公會每隔兩、三年都合辦運動會，畀兩岸四地律師喺運動場上一較高下。今年移師香港體育學院舉行，尋日舉行開幕禮好熱鬧，啱啱完成極地馬拉松嘅翟氏律師行創辦人翟文禮（Raymond）都有出席。

翟文禮（右）、馮錦雄（左）同馮太成功挑戰沙漠馬拉松賽事。

Raymond上月先同香港截肢者協會（協會）副主席馮錦雄夫婦，三人五足遠赴智利阿塔卡馬沙漠，參加全球四大沙漠賽事之一嘅極地馬拉松。佢哋要喺七日內完成二百五十公里行程，期間要自備糧水、食壓縮同脫咗水嘅「太空餐」，仲要面對每日高達五十度嘅溫差，條件咁惡劣，結果佢哋不但完成賽事，仲贏得團體賽冠軍，為協會籌得十幾萬元經費，馮錦雄仲係全球第一個完成同類馬拉松嘅截肢者添！

香港律師會前主席周永健都有到場，佢透露二十幾年前已經開始做運動保持身形，每星期會抽三日時間健身，唔怪得佢平日為慈善籌款獻唱，中氣十足啦！

同場嘅律政司司長袁國強被問到平時做開咩運動，佢居然笑言「瞓覺算唔算？」雖然佢尋日冇落場露兩手，但就主動撩現場嘅小朋友傾偈，表現細心，一副慈父樣。官場「鑽石王老五」嘅佢幾時有興趣生番個呢？

第一手消息請下載on.cc東網iPhone/iPad/Android/Windows Phone Apps