政壇：民主阿婆疑漏偷錄「恩」由
「民主阿婆」前政務司司長陳方安生尋日又再出動，聯同佔中發起人戴耀廷、陳健民等，現身灣仔為泛民助選。期間陳太再就港大副校長及校委會主席任命風波炮轟政府，仲大爆之前偷錄多名校委會委員閉門發言嘅人係一位學生代表，大讚對方有勇氣！須知當日校委會會議內嘅學生代表，就只有港大學生會會長馮敬恩一人，陳太唔通想話偷錄者就係馮敬恩？
尋日有記者問陳太點睇今次偷錄事件，年過七十嘅陳太起初好似唔係聽得好清楚，記者惟有再講多次，重申係想問佢點睇校委會閉門發言錄音流出事件。
陳太聽清聽楚之後就答一般而言係應該尊重保密機制，唔應該向外披露閉門會議內容，但由於校委會堅持唔解釋拒絕委任陳文敏做副校長嘅原因，令「學生代表」覺得有需要披露討論過程。佢之後仲補多句，話因為事件涉及政治因素，影響學術自由，先令到「呢位學生」攞出勇氣披露事件。
雖然好多人早就懷疑係馮敬恩偷錄同洩密，不過，一直都冇證冇據，而馮敬恩本人則對有關指控支吾以對。唔知陳太係純粹因為思覺同聽覺唔協調而搞錯咗，定係「鬼拍後尾枕」，講出得佢先知道嘅事實呢？
