政壇：搞搞政：大專辯論賽 K.O.拉布黨
立法會近年興起「拉布」潮，有人鬧浪費公帑、阻住地球轉，有人話係另類抗爭。尋日一場大專生普通話辯論賽總決賽，就以呢個現象為論題，結果由「反拉布」嘅科大獲勝，「拉布」喺辯論場都站不住腳，「拉布黨」成員梁國雄、陳偉業同陳志全會否喊冇癮呢？
支持拉布嘅正方認為，抗爭文化能夠將政治矛盾鮮明化，亦會吸引媒體作更全面報道，有助公眾了解議題，仲以反高鐵及反東北發展為例，證明拉布能夠號召市民包圍立法會，上屆立法會選舉嘅選民人數同投票率都上升，都係歸功於議會抗爭咁話。反方就反駁，喺一啲具爭議性嘅議題方面，唔使拉布都可以搞抗爭，正如反國教事件，無拉布依然吸引過十萬名市民集會，足以證明港人參與政治同抗爭文化無關。
反方進一步抨擊議會內嘅抗爭令議會形象低落，阻礙議會流程，減少其他議員發言機會，且調查發現市民對拉布反感，最終完勝。今次比賽總共有十一間院校參與，每隊派出四位成員，其中必須有一位成員為本地學生，立法會主席曾鈺成係辯論比賽評判之一。
