由嶺南大學校董李以力擔任校長嘅國力書院,被指涉嫌協助學生提早取得外國大學學位,事件震驚全城。本身喺大學教書嘅衞生服務界立法會議員李國麟(Joseph),原來係嶺大首名博士畢業生,佢話自己所持嘅真係博士學位,仲笑言「除非嶺大係流」。不過,佢話都留意到香港過去幾年有「泛學位化」現象,當局有必要加強監管辦學機構同課程。

Joseph二○○三年喺嶺大取得社會科學哲學博士,亦係嶺大首名博士畢業生。對於嶺大近日發生連串風波,包括協理副校長兼總務長夏迪星涉嫌剽竊,同埋國力書院涉嫌協助學生提早取得外國大學學位,身為校友嘅Joseph都話覺得驚訝同失望。佢又話,因為自己都喺大學教書,所以好關注事件,亦會同教育界立法會議員葉建源商量一下。

請人要留意學位來源

Joseph又覺得,近年社會出現泛學位化現象,包括「agency programmes(合辦課程)」湧現,最離譜係上網都可以買到假證書,令到獲取學位變成一件好容易嘅事。佢認為,當局要加強監管呢類非本地院校開辦嘅課程,最好有類似香港學術及職業資歷評審局嘅機構,負責評審外地院校開辦嘅課程,咁就容易啲睇到質素。佢又提醒,報讀呢啲合辦課程時,應考慮清楚院校嘅排名、學術地位同課程質素等。

除咗報讀嘅人要注意,Joseph又話僱主請人時都要小心,要留意吓應徵者所持嘅學位係點拎番嚟。至於佢所屬嘅護理界別,雖然都好多合辦課程,但有關院校都會派人嚟香港教授課程,所以喺過去二十年都未聽過用錢買學位嘅情況發生。

第一手消息請下載on.cc東網iPhone/iPad/Android/Windows Phone Apps