政壇：金管局執位 「孖李」紮職
金管局副總裁彭醒棠（Peter）明年二月就退休，估唔到金管局趁勢進行大執位，仲一次過改埋個架構添。現任助理總裁李達志（Howard）等四位高層獲「紮職」，不過，今次架構調整嘅亮點係，依家金管局只有三個副總裁，Peter退下火線後，就只剩副總裁阮國恒同余偉文，以後實行「雙巨頭」制。
李達志（資料圖片）
李令翔（資料圖片）
聽聞，因為營運需要，雖然冇咗一個副總裁，但分別會由Howard同按證總裁李令翔升任新設職位「高級助理總裁」，而陳景宏同李樹培就齊齊升做助理總裁。
市場一直睇好Howard係金管局明日之星，除咗因為佢當年負責面對傳媒時為人風趣，佢亦處理過唔少技術性棘手問題，聽聞佢會接手Peter唔少職務。等住睇佢點處理金融科技同基建呢啲燙手山芋。
