政壇：中文識講唔識寫 徐英偉語音輸入
公務員職位通常要求有一定水平嘅中文同英文語文能力，但作為政府問責團隊一分子嘅民政事務局局長政治助理徐英偉（Caspar）就自爆唔識寫中文，佢仲話依家即使用電話發送短訊，佢都係使用手機應用程式嘅語音功能。
徐英偉自爆中文識講唔識寫，好彩當年考入政府唔使筆試。
Caspar講起佢○八年應徵政治助理一幕，話因為自己喺外國住咗好耐，所以當年見工面試時就畀人考起，問佢中文掂唔掂。當時佢仲喺恒生銀行任職投資服務經理，佢話︰「我依家喺恒生做緊，OK呀！」估唔到咁都畀佢過到骨。Caspar自言小學已經去咗外國住，中文得小五程度，依家都唔識寫中文，好彩當年見工只有面試，無筆試啫。
Caspar又憶述，當年見工時有一個考官好多嘢問，見佢喺加拿大住過就問佢關於加拿大嘅政制問題，跟住又問埋點睇當年美國總統選舉，以及當年候選人希拉妮同奧巴馬可以點合作等。呢個問題多多嘅考官係邊個？原來就係時任特首辦主任陳德霖喇！
