現屆政府任期只餘一年半，勞工政策或湧現追數風，事關特首梁振英（CY）競選特首時承諾會取消強積金對沖機制、訂立標準工時同落實退休保障政策，負責孭呢幾條「爛帳」嘅正正係勞工及福利局局長張建宗，佢身上原本已有明年開始接受市民申請的低收入在職家庭津貼，五大炸彈，一個都唔嘢小，企喺咁熱嘅廚房，小肥張何止有汗出，分分鐘仲有淚出添！

標時問題遭追數

CY政府餘下不足二十個月任期，工黨同工聯會多名議員早前都趁答問大會追數，喺取消強積金對沖機制同標準工時問題上，勞資雙方仍存分歧，但據聞CY並無藉詞拖延或留待下屆政府處理的打算。而退休保障方面，小肥張已表明，當局下月就會啟動為期半年的退休保障公眾諮詢，屆時不單止會諮詢公眾對退休保障方案的意見，仲會一併諮詢強積金對沖安排。此外，功能界別議員要求當局按個別行業、工種需要輸入外勞，但勞工界一聽外勞就反面，執住咁多燙手山芋，小肥張真係唔易做。

此外，原本為關愛基金項目的低收入在職家庭津貼計劃撥款申請，今年一月已經在立法會財務委員會獲得通過，當局預計十五至十八個月可以落實計劃，換言之明年中就可接受市民申請。咁多項目趕落鑊，已經滿頭煙嘅小肥張惟有頂硬上啫。

第一手消息請下載on.cc東網iPhone/iPad/Android/Windows Phone Apps