政壇：大舊報復剪布 圖休會玩「波」
立法會拉布沒完沒了，財務委員會啱啱通過咗政府成立創新及科技局嘅撥款，但財委會嘅漫漫拉布戰可能依家先揭幕。就創科局撥款申請提出數以百計臨時動議，但畀財委會主席陳健波剪布嘅人民力量議員陳偉業（大舊）同社民連梁國雄（長毛），尋日分別喺財委會提出休會同臨時動議玩嘢，大舊仲疑似玩報復，以陳健波不適合做主席為由提出休會，搞到兩個小時嘅會議只通過咗一項撥款申請，睇嚟陳健波同佢嘅爭鬥仲有排玩。
財委會尋日開會審議長沙灣政府聯用辦公大樓施工前顧問服務同工地勘測工程嘅撥款申請，涉款一億三百二十萬元。有關撥款申請原本爭議性唔大，但大舊就喺會議開始大約十五分鐘提休會動議，不滿陳健波喺上周五審議創科局撥款申請時剪布。大舊斥責陳健波之前處理臨時動議方式前後不一，為執行政府任務而有失中立，係立法會嘅恥辱，仲揶揄來自保險界功能界別嘅陳健波係「零票議員」。另一拉布議員陳志全更揚言考慮向陳健波提不信任動議。
建制斥理由無稽
建制派議員就批評大舊因為不滿陳健波而提出休會係無稽，其中議員蔣麗芸就話，公帑係市民畀議員開會做事，唔可以話唔鍾意主席就休會，仲話︰「你唔鍾意可以去後面講數，休咗會咁我點啫？」結果休會動議以三票贊成、三十九票反對被否決。不過，之後長毛、大舊等就繼續多次發言拉布，長毛仲喺會議結束前十五分鐘提出臨時動議，結果會議將近結束，先可以就撥款申請表決。撥款申請終喺三十四票贊成、零票反對下獲通過。
尋日議程原本仲包括環境保護署、消防處、運輸及房屋局、司法機構同機電工程署嘅開設職位申請，但除咗環保署外，其他申請都未及討論。咁嘅進度睇嚟陳健波都要諗吓計嘞。
