城中鏡：謝凌潔貞 盲食秘訣
稻苗學會早前舉辦會慶晚宴，當晚會慶有別過往宴會，主席邱金榮同一眾飲食界成員，一開席就齊齊戴上黑色眼罩，蒙住雙眼食飯，原來係要體驗視障人士進餐時嘅感覺同困難。食物及衞生局常任秘書長謝凌潔貞都有出席，見佢拎住對筷子篤篤吓，再沿住隻碟掃咗個圈，之後就一擊即中夾中一件食物。
謝凌潔貞蒙眼進食，原來暗藏秘訣。
黃浩鈞（右）同陳家強都話，喺外國讀書時每日都食加工肉類。
邱金榮話增設凸字餐牌，可方便視障人士點餐。
謝太話認識一位義工分享過視障人士進食嘅情況，會先用嗅覺感受有乜食物放喺面前，然後至落手，好似當晚佢聞到餸菜一上枱時有陣西芹味，而根據佢經驗，西芹通常都係炒蝦，所以佢就用筷子篤咗幾下，感覺係咪有類似嘅物體，之後再探索吓隻碟範圍有幾大，估計食物位置。
邱金榮倡設凸字餐牌
邱金榮就話視障人士平日喺生活上仲有好多不便，例如點餐時睇唔到餐牌，所以佢近日就喺旗下食肆增設幾份凸字餐牌，又提議學會內其他成員都考慮有關建議。
講起早前世界衞生組織宣布將加工肉類列入為最高風險致癌物，同香煙、酒精相若。太興集團老闆陳永安話消息一出，對佢哋生意明顯有影響，尤其係消息公布當日朝早，立即少咗人食餐蛋麵等常餐。但佢話好多嘢都係少食多滋味，好似燒烤咁，燒燶一樣會致癌，但間中都係會想食一次，唔過量就得。
香港餐務管理協會主席楊位醒認為飲食要均衡，樣樣食物都唔可以食太多，鮑魚日日食一樣消化唔到，要視乎個人身體狀況選擇食物。後生一輩如香港餐飲聯業協會副主席黃浩鈞同陳家強就一於少理，話喺外國讀書時日日都食加工肉類，依家都習慣咗喇！
