一年一度嘅澳門格蘭披治大賽車即將上演，香港亦將會舉行Formula E賽事，一股賽車熱潮席捲全城，好多人都想親身體驗風馳電掣嘅感覺，由工商廈改建嘅室內賽車遊戲室應運而生，開到成行成市。

呢，本報記者去觀塘一個工廈賽車場睇過，三千平方呎嘅單位，可以同時容納六名車手作賽，賽車以電力推動，最高時速可達二十幾公里，玩家除咗可以鬥速度，而且可以享受飄移嘅快感添。據負責人講，車場生意相當理想，開業短短兩星期就吸引唔少客人預訂。除咗甩尾賽車，亦有工廈開設室內遊戲機中心，以一比一賽車模擬器為賣點，有啲更加不惜工本，購置體感賽車機及模擬飛行遊戲機，五花八門，各適其適。

即係咁，室內賽車係就係夠刺激，弊在安全設施不足，一個唔好彩分分鐘樂極生悲。好似上述賽車場咁吖，車手唔使佩戴頭盔及安全帶不特止，場邊求其鋪啲車胎就當係防撞設施，部分彎角甚至無遮無掩，睇見都牙煙喇。正如專家話齋，甩尾所產生嘅撞擊力，足以令一個成年玩家頭部創傷及骨折，問你怕未！

咁都唔止吖，呢啲室內車場同遊戲機中心，全部未經機電工程署審批，亦未領取公眾娛樂場所等相關牌照，部分更因違反地契用途而被釘契，萬一發生意外，隨時連保險都冇得賠o架。

正所謂，有需求就有市場，賽車熱潮方興未艾，室內賽車場大行其道，一啲都唔出奇。對於呢啲新興玩意，當局只要做好規管工作，唔止可以創造商機同就業機會，市民亦多個休閒地方，未嘗唔係一件好事。可惜吖，港產官僚後知後覺，室內賽車場遍地開花，民政事務總署及食環署居然懵然不知，如果唔係本報查詢，可能仲瞓緊覺添。

所以話，隨着時代不斷前進，潮流玩意推陳出新，做人又好，做官都好，最緊要與時並進，因時制宜，唔可以一本通書睇到老。大家有眼見，無論係醫學美容、網購食品、手機召車應用程式或無人機航拍，港府對於呢啲新興事物唔係放任自流，就係眼開眼閉，次次都要出事至補鑊，你話係咪混帳吖。

點講都好喇，室內賽車始終有風險，萬一出事，後果可大可小o架，唔該港產官僚拿拿臨加強規管，堵塞漏洞，唔好又見到棺材至流眼淚吖，叮！