城中鏡：嘩鬼開P
話說中華廠商聯合會一班青委每逢大節日都搞派對聯歡，而啱啱過咗嘅萬聖節都唔例外，廠商會常務會董Johnny楊華勇一如往年，喺清水灣大宅舉行哈囉喂派對，一班青委「嘩鬼」都悉心打扮現身。Johnny除咗預備大量嘅大閘蟹外，楊太Fiona莊菲娜更廚神上身，預備咗多道正宗福建菜，祭一班嘩鬼嘅五臟六腑。
楊華勇（中）、太太莊菲娜（左一）、兩個小朋友同太太細妹莊莎娜扮海盜家族入型入格。
許穎嘉（前左）、周雯玲（前中）、王詩雅（前右）、Charles（後左）同李慧芬回憶童年往事。
扮海盜嘅仲有蔡志婷（左一）、陳家偉（左二）、蔡少森（左三）同羅永邦。
唔知係咪食正近日嘅電視劇風潮，當日特別多人扮海盜，先有主人家Johnny一家大細扮成海盜家族，霸氣十足，名譽會董蔡少森扮張保仔，亦維肖維妙，更笑言扮相太似一個賊，差啲入唔到屋喎。其餘各人亦出盡法寶，着上唔同服飾，化身天使、魔鬼同各種卡通人物及英雄。
黃浩鈞情迷蜘蛛俠
其中常董李世傑、會董孫榮良同太太Joyce、青委副主席黃浩鈞、委員史昊洺等夾埋一齊扮成恐龍戰隊，蒙住個頭出場，充滿喜感，勾起大家童年回憶。講起最愛嘅英雄同卡通人物，楊華勇話至愛蝙蝠俠，黃浩鈞就鍾情蜘蛛俠，話一嚟鍾意藍色，二嚟蒙住面夠神秘，佢仲收藏咗百幾本蜘蛛俠嘅漫畫喺床底，部分已經有二十幾年歷史，成套可能好值錢。
除咗英雄同鬼怪，亦有人扮IQ博士嘅小雲同壞蛋掌門人等受歡迎嘅動畫角色。青委副主席王詩雅憶起，細個被父母罰企門外，聽到細佬喺屋入面睇緊超人好開心，但超人竟然唔拯救佢，令佢好失望。會員許穎嘉同Fiona就話美少女戰士係每個80後女仔嘅集體回憶。
