政壇：兜巴星：拒出席TSA公聽會　吳得掂因私忘公

依家全港家長都關心全港性系統評估（TSA）對學童子女嘅影響，係咪取消評核，惹起全城爭議。外號「吳得掂」嘅教育局局長吳克儉，前日出席立法會會議又遭到議員狙擊。立法會教育事務委員會主席林大輝話，已決定喺本月二十九日就TSA爭議舉行公聽會，要求吳得掂出席聽意見。點知吳得掂話自己都好想出席，但當日咁啱因私人理由要離港，無法親身出席公聽會。咁唔負責任，難怪有議員寸爆佢做鴕鳥，亦有議員問佢，如果高官可以私人理由唔開會，咁學生係唔係可以因私人理由唔做TSA呀？吳克儉咁唔得掂，不如唔好做官啦。