繼港大校友關注組早前因不滿校委會「等埋首席副校長」同拒絕任命法律學院前院長陳文敏為副校長，發動港大百年以來首次畢業生議會投票之後，港大學生會又因反對中大前校長李國章出任校委會主席，而舉行校內公投。

疑造假象 逼走李國章

尋日又輪到港大校友關注組聯同港大教師及職員會宣布發起「港大校園投票計劃」，由港大民意研究計劃提供技術支援，港大學生會協辦。投票將於下周一至周五舉行，計劃分別就校委會否決副校人選表示遺憾、對校委會主席梁智鴻同否決副校長人選嘅校委表示不信任，以及李國章不適合出任校委會主席三項議案投票。以上議案，同上次學生會舉行校內公投其實異曲同工，真係唔知點解要投完又投。

另一公投喺本月底舉行，港大畢業生議會常務委員會宣布，決定於本月二十九日召開第二次特別會議，討論同議決五項動議。兩次公投都針對李國章出任港大校委會主席，動議中更有一條指名道姓指李國章不適合擔任校委會主席。過去幾次公投中走在最前線「衝鋒陷陣」嘅除咗港大學生會會長馮敬恩，其次就係港大校友關注組召集人、立法會教育界議員葉建源。

雖然常務委員會願意應校友要求再辦特別會議投票，但聲明指召開特別會議會耗費大學唔少人力同財政資源，必須審慎行事，該會多次向相關校友建議唔同方法協助表達意見，但不獲接納。常委會憂慮召開會議一事或被濫用，稱會損害港大同港大畢業生議會公信力。常委會此言，莫非佢哋唔同意校友關注組經常搞公投？

數一數，港大三個月之內已舉辦四次公投活動，同一議題投幾次票，目的昭然若揭，莫非想借助群情洶湧假象，逼走李國章？

第一手消息請下載on.cc東網iPhone/iPad/Android/Windows Phone Apps