政壇：單身張雲正 有「心上人」
之前同大家講過，上任冇耐嘅公務員事務局局長張雲正係罕有未結婚嘅局長，尋日佢首次以局長身份頒發嘉許狀畀公務員，當然要幫一眾剩女問吓佢有冇拍拖啦！唔知係咪怕醜，佢哈哈大笑話呢樣唔答喇，但透露有好多個心上人，唔通呢個鑽石王老五咁花心？佢指媽咪係其中一個，而所有公務員都係心上人，認真識冧班公務員喎！
張雲正
張雲正仲話公務員喺薪酬同福利方面，比起私人同公營機構嘅彈性較少，明年會將嘉許狀嘅名額由八十個增至一百個，係對辛勞工作嘅同事給予最低限度嘅認同。同樣上任冇耐嘅常秘周達明，否認早前有人搵過佢做局長，話自己「何德何能」，大讚張雲正講嘢好叻又習慣面對傳媒，好適合做局長喎。
