政壇：四人幫夜聚黎宅 又謀攪局
有「搞事四人幫」之稱嘅壹傳媒集團前主席「肥佬黎」黎智英等人又再密會！外號「李漢奸」嘅白鴿黨創黨主席李柱銘、天主教香港教區前主教陳日君，以及久未出席「搞事四人幫」聚會嘅「民主阿婆」前政務司司長陳方安生，尋晚就前後腳去到肥佬黎位於何文田嘅大宅。咁人齊，唔知佢哋係開派對，定係又再密謀攪局，想攪亂香港呢？
陳日君於晚上約七時抵達黎智英寓所。
陳方安生（左）同疑似係劉勝義神父嘅外籍男子（右）乘坐同一部車抵達。
李柱銘夫婦自行駕車抵達。
插手黨務惹眾鴿不滿
尋晚約七時，李漢奸夫婦、民主阿婆同陳日君陸續抵達肥佬黎寓所。最早到嘅係乘坐肥佬黎座駕抵達嘅陳日君，但見到陳日君喺車上扁晒嘴，黑口黑面咁款，隔咗冇幾耐，李漢奸兩公婆就自行駕車到達喇；至於民主阿婆就最遲先到。而同民主阿婆一齊乘坐肥佬黎座駕到達嘅，仲有曾被傳媒報道收取過肥佬黎捐款、疑似係劉勝義神父嘅外籍男子。眾人逗留大約兩小時後，就齊齊離開黎宅。
最近正值發生港大校委會同主席人選風波，嚟緊又到區議會選舉，搞事四人幫喺呢個時候聚頭，係咪討論有關議題、甚至部署行動呢？講開又講，日前有白鴿黨黨員去信黨中常委，要求黨友唔好同肥佬黎、陳日君同民主阿婆搞得過熱，以及唔希望佢哋插手白鴿黨事務，仲話會喺年底黨員大會跟進。估唔到話口未完，搞事四人幫又見面，睇嚟真係啲白鴿發噏瘋，唔知班白鴿敢唔敢提出踢李漢奸出黨？
