政壇：旅議會引爆連串選戰
等了又等，旅遊業監管局最快都要等到一七年才能成立，所以旅遊業議會（旅議會）目前仍然擔當重要角色。旅議會四名業界理事，即將於本月底改選，到下月改選主席。除咗主席位有競爭外，最新消息係有唔少新人爭奪理事位置，當中包括富二代組成嘅百仁基金副主席Anthea羅詠詩，唔知佢同旅遊業界有乜關係呢？
黃進達 梁耀霖 梁天龍疑爭連任
旅議會理事會係由議會主席、八名選舉產生嘅理事、八名屬會代表同十二名政府委任嘅獨立理事組成。八名選舉產生理事任期兩年，每年改選四人，今年就輪到康泰旅行社董事總經理Jason黃進達、入境旅遊接待協會主席梁耀霖、知心旅遊行政總裁梁天龍同尊賞假期總經理胡宇緯到期。聽聞黃進達、梁耀霖、梁天龍有意競逐連任，仲有四名新人有意爭奪最後一個理事位。
究竟Anthea同旅遊業界有乜嘢關係？原來佢爸爸係萬通集團老闆，經營旅行社，專做入境旅遊生意，又經營旅遊車隊，都算係旅遊界第二代，近年嚟主攻精品酒店，最近亦被委任為嶺南大學校董。有意參選嘅，仲包括太古旅遊董事總經理梁志群、關鍵旅行社副總經理許書漢同旅行社東主協會理事鄧雯蕙。
至於點解會出現多人爭位？應該同旅議會主席胡兆英即將卸任有關。有旅遊業界中人就分析，部分同主席將會換人有關，因為只有理事先可以參選，現時盛傳有意爭奪主席位嘅有Jason同金怡假期董事長葉慶寧兩大陣營，相信想趁選舉理事嘅機會，爭奪主導權。
