內地送禮賄賂官員，手法五花八門，其中一招叫做「雅賄」，即係送古董字畫等藝術品咁解，原因係藝術品價格任你講，收受雙方冇咁容易斷正。嗱，本港高官收受禮物指引漏洞多多，會唔會上演呢一幕，冇人話得埋㗎。

話說因前特首曾蔭權爵士被踢爆任內接受富商款待，加上前廉政專員湯顯明以及發展局局長陳茂波等被揭涉嫌收受利益或出現利益衝突，港府兩年前修訂問責官員收受禮物指引，首次引入「私人利益」概念，又限定官員喺婚宴等場合收禮嘅價格上限。指引就有嘞，成效如何呢？

喺度有必要先表揚一下本報記者嘅堅毅同恒心，事關三司十二局首長嘅收禮申報資料，並無上網供公眾查閱，而要逐個聯絡及預約，有政策局足足拖咗成個月，集齊全部資料，仲辛苦過砌五千塊拼圖。當局係歡迎定係抗拒監察，畫公仔唔使畫出腸喇啩。

咁究竟高官們呢兩年嚟收過乜嘢禮物呢？簡直無奇不有，例如環境局局長黃錦星就收到五十二個用過嘅利是封，咁都當「禮物」申報，真係唔到你唔服。呢啲都唔係大問題，最離譜嘅係，絕大多數高官冇列出禮物嘅估值，至於送禮人身份以至收受禮物嘅場合、地點、送禮原因等資料更加係一概欠奉，當中有冇利益衝突，根本無人知。

好似律政司司長袁國強同民政事務局前局長曾德成咁吖，禮物清單上不約而同出現一支酒。喂，超市幾十蚊有交易嘅係酒，曾爵士當年從禮賓府大箱大箱搬走嘅茅台又係酒，點可以相提並論㗎。仲有吖，勞福局局長張建宗收到一頁郵票，點知係咪早排喺拍賣會以九百五十萬美元成交嘅「一分洋紅」(One-CentMagenta)郵票㗎！

有學者就講得啱嘞，要求官員就每份禮物進行估值，的確有啲強人所難，但最少都要詳細列明收禮場合等細節，否則申報制度將形同虛設。話時話，好多國家對官員收禮有嚴格規定，俄羅斯總統普京最近要求官員除辦公用品同鮮花，其餘禮品一律上交，港府「拿來主義」咪得囉！

正如領導人話齋，要反腐，就一定要令官員「不敢貪」、「不能貪」、「不想貪」，堵塞利益申報制度漏洞，咪就係令官員「不敢貪」嘅第一步囉，咁簡單嘅嘢都做唔到，仲講乜嘢反腐吖，叮！