城中鏡：陳鈺芸 化身夢露行善
紐約大學（NYU）喺香港嘅舊生會前晚舉行以「荷里活」為主題嘅慈善舞會，為仁人家園籌款，幫助貧困地方家庭重建家園。
薛芷倫以天使打扮出席慈善舞會，對抗猛鬼。
陳鈺芸第二年任主席舉辦大型舊生會舞會，打扮成瑪麗蓮夢露。
薛芷倫天使look抗猛鬼
呢次舞會由紐約大學舊生會會長兼武打女星JuJu陳鈺芸籌劃，佢以瑪麗蓮夢露裝扮現身，仲喺臉上貼上經典嘅痣，佢話：「其實我原本眼睛附近都有粒墨，不過人哋話係淚墨，所以後來我脫咗！」一向有ball后美譽、大家都公認衣着有品味嘅Fanny薛芷倫爵士以天使打扮出席，佢話：「因為太多猛鬼，所以我扮天使，而且我有一顆天使嘅心，呢個世界太多魔鬼啊！」
身為該校舊生嘅Fanny，話希望學校每年都舉行一次慈善舞會，又話﹕「呢間大學嘅電影學院好出名，李安、安祖蓮娜、Lady GaGa、占士法蘭高（James Franco）都係舊生，我知道好多香港娛樂圈中人都係呢間大學出身，希望可以召集多啲舊生出錢出力。」
JuJu話好高興今年係第二年任主席舉辦大型舊生會舞會，仲得到好多舊生支持。被問及反應咁熱烈，若明年再搞，會有乜嘢構思？佢話：「我同Lady Gaga 同一年入讀紐約大學Tisch學院。對方係修讀音樂，而我就讀電影，雖然大家修唔同科，但係喺學校啲Show都見過佢表演，佢真係好有才華！嗰時佢叫Stefani，經常自彈自唱表演。如果可以以舊生會名義，邀請到佢嚟我哋出年個慈善舞會做特別嘉賓就超正！」
