城中鏡：遠足百萬行 善款陸續嚟
香港善德基金會今年首次搞遠足百萬行，除咗為旗下「善德關愛科研青年發展計劃」籌款之外，仲希望可以鼓勵市民到郊外遠足，有助身心健康。尋日見到基金會創會主席董吳玲玲偕丈夫董中浩同孫女一齊行，同場仲有創會副主席藍國慶同太太Mina藍王雲仙。藍國慶係活動籌委會主席，Mina仲有份負責計劃路線添！今次百萬行會持續四星期，約有四十支隊伍參加，目前已籌得逾三百萬元善款。
藍國慶（右）同太太王雲仙一齊籌備今次遠足百萬行工作。
葉文娟（左）同丈夫（右）怕醜，要拉埋譚姜美珠先肯影相。
董吳玲玲（左）同丈夫董中浩（右）帶埋孫女出席活動。
藍國慶傷手棄搏擊
同藍國慶傾開，原來佢十年前有玩自由搏擊，仲對自己要求好嚴格，不論身形定係搏擊招式上都有所追求，但就因為太過追求，所以整傷手部關節，最後只好選擇跑步健身。至於Mina都有行山習慣，佢仲鍾意游水，所以今次活動對佢冇難度。Mina講講吓，透露原本今次活動路線再長啲，但為咗遷就冇遠足習慣嘅參加者，所以縮短路線。
董中浩就話以前兩個仔仲細嘅時候已經行山，秋天時一星期會去行三次，夏天就會帶囝囝去游水，仲會叫埋一班朋友一齊去開心吓。不過，佢話依家啲細路可能多活動，所以行山都少咗喇！董吳玲玲就話每朝都會喺屋企附近行四十五分鐘，仲希望可以保持到呢個習慣，個人都會健康啲喎。
行行吓仲遇到社會福利署署長葉文娟同丈夫行山，葉文娟話平日工作忙，冇乜時間做運動，所以一到假日，就會同丈夫行山keep吓fit喎。葉文娟丈夫本來怕醜唔敢合照，最後見到博愛醫院主席譚姜美珠，先肯一齊合照，葉文娟就解釋話：「我哋低調嘛！」
