政壇：駕馭男下屬 唐慕貞靠義氣
香港傢俬裝飾廠商總會常務副主席兼茲曼尼創辦人Jane唐慕貞，可以話係傢俬行內罕有嘅女將。話說佢斯文細聲、聲線唔夠尖、樣子唔夠惡，到底係點樣管理一班以男士為大多數嘅下屬？講起最初入行時，面對一班老師傅，佢就話有前輩教路「唔講粗口講義氣」，講得出做得到，以獲取身邊同事尊重。
唐慕貞唔講粗口講義氣，獲行內師傅尊重。
初入行曾遭冷待
阿Jane話初入行時，幫公司負責做外貿，好多時出去見客，其他公司高層都會當女士冇到，對佢視而不見之餘，有時仲會安排佢坐隔籬枱，但佢一於厚住面皮，堅持擔張櫈過去一齊坐。
反而，平日粗聲粗氣嘅師傅，就對佢特別好，事關平日好多老師傅都驚「教識徒弟冇師傅」，但係當年啲師傅對佢就冇乜保留，仲教識咗佢好多嘢。
講到近期零售業生意差，早前更有連鎖傢俬集團全線結業，阿Jane就話佢哋受到嘅影響不大，事關佢哋係以本地客同埋訂造梳化為主，笑言好多港人鍾意返轉頭訂造同一型號梳化，所以需求就相對穩定。
