政壇：聲拆捱到殘 郭振華退出政壇

郭振華話做區議會主席要成日講嘢，四年嚟把聲「拆」咗好多，仲因為咁唱唔到歌添，但笑言把聲變得磁性咗。雖然棄選意味來屆唔再做主席，但佢現時係回收基金諮詢委員會主席，同樣要花唔少唇舌。為咗保持聲線，佢話盡量避免長時間講嘢，同埋會帶備柑橘水傍身，咁樣會容易啲開聲。

佢又透露，回收基金喺上月初供業界申請，直至本月底截止，今次係同生產力促進局做合作夥伴，每次開會都有近二百人參加，反映業界積極參與，希望未來可以提升回收物料嘅質量。

至於區議會主席一職會由邊個接任？郭振華就話唔想多講，但就話主席人選已經做咗區議員一段時間，並擔任多個委員會主席，有足夠經驗主持會議喎。