政壇：搞搞政：譚耀宗全退 交棒年輕人

譚Sir尋日喺電台節目中透露，有意喺明年退下火線，立會議席交由年輕人接棒。佢承認黨內有聲音，認為佢咁做，可以起示範作用，所以目前正游說黨內人士支持。其實外界一直關注建仔老一輩退落嚟，年輕一代喺議會內有冇議價能力，加上近年議會氣氛轉趨激烈，又要應付「拉布」等問題。

象哥引退有懸念

但既然政黨年輕化係大趨勢，而譚Sir亦喺大氣電波中表明心迹，相信都係經過深思熟慮，亦立此存照，唔能夠隨便出爾反爾，否則堂堂大黨，就讓外界感覺很兒戲。

至於曾鈺成、葉國謙同陳鑑林退下火線，基本上已成定局。曾鈺成早前多次表明無意再參選立會，卸任立會主席後，會集中精神籌組智庫；葉國謙已宣布將區議會議席交畀其助理，即意味佢明年唔會循區議會第一功能界別躋身立會；陳鑑林亦決意將其九龍東地區直選議席交棒畀第二梯隊。

目前唯一有懸念嘅只剩下象哥，雖然佢曾揚言交棒畀黨內第二梯隊周浩鼎，但佢從來冇正面回應過下屆會唔會放棄競逐連任進出口界功能界別議席，而且言談間，亦流露出有意坐多一屆嘅感覺。換句話講，建仔下屆好大機會會「五退四」，走剩象哥一個人，但係咁樣算唔算係全面落實年輕化，真是值得商榷。