香港有垃圾灣，大家知唔知喺邊度？答案係除咗石澳，而且遍布全港，海洋垃圾堆積如山，到處可見，咁仲唔係一個個垃圾灣？

嗱，環保團體去年七月至今年五月，喺二十七個海岸地點進行海洋生態及海洋垃圾調查，發現海洋垃圾問題嚴重，其中大埔元洲仔、西貢小棕林及大嶼山芝麻灣成為重災區，平均每五米收集到幾百件垃圾，都咪話唔誇張。至於垃圾類型咯喎，塑膠廢物居首位，佔咗幾乎八成半咁滯。

海洋垃圾堆積如山，咪以為淨係海洋生態受破壞吖，人類亦隨時自食惡果。正如環保組織話齋，如果魚類進食塑膠物質，會間接令有毒物質進入食物鏈，人類長期食用被污染嘅海洋生物，可能攝取有毒物質而不自知，後果可大可小，唔講得笑o架。

係人都知，香港一向以美麗海景聞名，避風塘食海鮮更加充滿港式風情，依家搞到處處都係海洋垃圾，香港淪為臭港，講出去都羞家喇。其實，唔使環保團體踢爆，本報記者早前實地視察深灣避風塘鴨脷排，發現海面漂浮大量膠袋及膠樽，成個島被垃圾包圍同覆蓋，同垃圾崗冇乜分別。

冇錯，要清除海洋垃圾，必須官民合作，香港淪為垃圾崗，港府固然有不可推卸嘅責任，市民亦要自律。正所謂，港府靠得住，豬乸會上樹，港產官僚向來將環保當做騷，旨意佢哋清潔香港喎，蛇都死喇。歌仔都有得唱，香港是我家。大家應該做好本分，減少製造垃圾，更加唔可以亂拋垃圾，淪為破壞生態環境嘅幫兇。特別係處理塑膠垃圾，更加唔可以「丟」以輕心，否則，香港做唔成「鮮花港」，反而淪為「垃圾港」，咁就該煨咯。

當然喇，要解決海洋垃圾問題，港府嘅責任始終最大。早前環保團體踢爆石澳垃圾灣淪為名副其實嘅垃圾灣，政務司司長林鄭月娥即刻煞有介事走去實地視察，但對其他海洋垃圾重災區就熟視無睹，擺明係做騷喇。嗱，如果港府官僚唔想畀市民當垃圾丟棄，唔該拿拿臨補鑊，真真正正搞好清潔運動，否則就唔係「官到無求膽自大」，而係「官到無能禍自大」喇！

一句講晒，海洋垃圾成大患，速速拆彈莫等閒。香港爆出遊客被毆斃醜聞，已經臭名遠播，如果海洋垃圾繼續堆積，臭上加臭，香港想唔變臭港都幾難，叮！