城中鏡：海南尋夢
當提起有「東方夏威夷」之稱嘅海南島，唔少人即刻諗到陽光與海灘。對於三十幾歲就接下龐大高爾夫球場王國嘅觀瀾湖集團主席Ken朱鼎健嚟講，海南係佢搵到一片天地嘅夢土，事關佢一手打造海口觀瀾湖度假區，將家族事業推上另一高峰。阿Ken近期更創立香港海口聯誼會，並擔任創會會長，希望促進海南同香港嘅交流，令更多年輕人喺內地搵到發展機會。
盛智文（左二）出席見證朱鼎健（右二）、陳李妮（右一）同海口聯誼會執行會長關錦添就職之喜。
張學修（左）冀政府關注業界經營難題，旁為海口聯誼會主席黃華康。
林大輝（右）、海外潮人企業家常董林月萍（中）同會董林思俊都去捧場。
身兼聯誼會常務副會長嘅博愛醫院副主席陳李妮係地道海南姑娘，佢經常帶朋友去海南旅行，次次返港，必帶海南知名嘅文昌雞做手信，一次過閒閒地帶十隻。佢笑稱，帶雞入境，只要煮過就冇問題，依家仲有真空包裝服務，夠晒衞生方便。
林大輝憶朱鼎健父球場事
同阿Ken攜手打造海口蘭桂坊嘅蘭桂坊主席盛智文、中華出入口商會會長張學修都有到場。張學修話要幫商界發聲，因為出入口係香港三大經濟支柱之一，舊年貿易總額達一萬億美元，就業人口達五十萬，但經營環境嚴峻，業界請人好難，冀政府諗計解決。
轉頭見到立法會工業界議員林大輝，佢話同阿Ken嘅爸爸朱樹豪相識多年，當年一齊踢波時嘅點滴，講都講唔晒。記得佢哋有次贏得足球賽冠軍，朱樹豪將九樽啤酒倒落獎盃中，然後一口飲盡，當年豪氣，至今難忘。
