政壇：搞搞政：撐反佔領紛爭 中學慘成磨心

港大教育學院、香港中學校長會同政策二十一由今年六月開始，向全港四百九十八間中學嘅校長、喺佔中期間任教中五同中六嘅教師發出問卷，了解佢哋對佔中嘅取態，以及如何看待佔中後嘅學生。調查最終獲得一百六十八間學校回應，包括一百三十一名校長及一千四百一十一名教師。調查結果顯示，近九成學校有學生要求響應罷課，亦有八成多學校有學生提出反對罷課。罷課形式方面，學校容許罷課學生喺校內集會討論、自修、甚至請假或曠課。

各方勢力拉扯 難保中立

調查機構指學校面對罷課同佔中嘅主要原則，係保持政治中立，以及鼓勵學生作多角度思考。但亦有部分學校嘅原則係遠離政治、唔支持學生參與佔中，以及勸喻學生避免參與佔中。雖然分別有接近五成教師認為，佔中並無對學生的學業及師生關係造成影響，但仍有一成多人認為有消極影響。此外，有部分人認為佔中對學生嘅個人品行、態度同社會認知造成負面影響。

香港中學校長會主席李雪英話，舊年九月初，面對唔同勢力想爭取中學生支持或反對佔中，學校陷入極端嘅勢力拉扯。佢又話當時校方嘅心態很矛盾，一方面擔心討論佔中會觸動學生情緒，但又擔心唔討論會失去先機。除咗上述團體，辦學團體、家長同校友都會對校方構成壓力，例如有校友喺報章刊登廣告促請校方表態。作為校長，最唔想學校捲入政治漩渦，亦唔想政治勢力令學校難以保持中立。一場佔領行動，相信令唔少校長、教師心力交瘁。