喺立法會尋日舉行嘅特首答問大會上，多名議員都問到關於「去殖民化」問題。其中衞生服務界議員李國麟問到，近日本港郵筒上嘅皇冠標誌被遮蓋，香港會唔會好似日本咁刪除歷史，又指現時中、英外交處於黃金期，有關做法係咪有問題，喺政治上同外交上係咪唔正確，特首CY梁振英上京述職時又點樣交代？點知CY回答問題時，就誤將李國麟叫咗做教育界議員葉建源。

唔知係咪因為李國麟同葉建源兩人都身形高瘦、佩戴眼鏡，定係兩人知名度較低，令CY認錯呢？李國麟喺答問大會上又話，有個五歲小朋友同佢講，話近日有郵筒唔見咗，唔知香港會唔會好似日本咁刪除歷史，又話禮賓府同香港大學都係英國人興建嘅，唔知禮賓府又會唔會因而被拆掉，唔能夠再睇杜鵑花，亦唔知港大校政會唔會不斷被干預。

被葉老屈過 對佢印象深

CY回應話，喺回歸前已討論有關問題，所有帶有皇冠標誌、有主權象徵嘅政府器具、文書同警察徽章等已改過，呢個問題並非新事物，又話有關問題唔會向國家主席匯報。惟CY回答問題期間，就誤將李國麟叫咗做「葉建源」，其後先更正。李國麟就回應︰「歷史上我叫李國麟議員。」

老實講，李國麟喺○四年當選至今，已做咗十一年議員，但喺港大民意研究計劃所做嘅議員評分調查，從未打入十大議員榜內，可想而知，市民對佢嘅認識都唔多，而葉建源只係做咗三年議員，亦冇上過十大議員榜，但喺近期港大委任副校長風波中，身兼港大校友關注組召集人嘅佢企喺最前線，仲曾大肆質疑CY同港大校長馬斐森會面，係為咗副校長任命事宜，向港大施壓，炮轟干預院校自由，而CY同港大先後發表聲明公開澄清，明摑咗佢一巴。畀佢老屈過，CY可能對佢印象深刻啲啩！

第一手消息請下載on.cc東網iPhone/iPad/Android/Windows Phone Apps