政壇：盧寵茂勸馮敬恩 咪搞革命
香港大學校務委員會上月底決定唔委任陳文敏做副校長（學術人事及資源），校委之一、學生會會長馮敬恩會後大爆會上各校委發言，更引述盧寵茂話陳未對佢跌倒有慰問，事後議論多多，但馮敬恩除被指洩密外，仲被踢爆引述唔正確。盧寵茂尋日以師兄身份，喺個電台節目發信畀馮敬恩，除勸勉馮「循序漸進總比革命突變」對港大更好外，仲暗示應尊重私隱、獨立分析及勤勉盡責，只係唔知馮聽唔聽得入耳。
暗寸無尊重私隱
盧寵茂喺信中，大講佢同馮敬恩嘅矛盾與共同點，指出兩人都係港大學生，但都唔係喺香港出世，喺香港長大，又係中國人，佢用自己嘅幾個角色，向馮敬恩講述佢嘅睇法。盧醫生話，自己身為科研人員，從來唔會預設立場，會審視數據、客觀論證、獨立分析，然後至會作出結論，絕對無人能干預佢。至於醫生專業，佢就重點談及尊重病人嘅私隱，話「一個專業人員絕對不能披露」。
呢啲說話，有冇曲線質疑馮敬恩不遵守保密原則，洩露校委會會議情況嘅行為，真係見仁見智。除咗做人嘅大原則，盧醫生又回想今年七月；曾經同馮敬恩傾偈，話自己早上七點半已開始部門會議，當時馮話一定不能夠參與，因為馮每日唔到十點都唔起床，盧醫生當時已向馮敬恩講，「人的潛能是無限的」。此外，盧醫生亦提點馮，既然佢係學生代表，就應多代表學生喺會上表達意見，而馮之後亦的確較之前多咗發言。
由盧嘅公開信嚟睇，馮敬恩七月前參加校委會議，似乎比較「走過場」，同副校長委任爆出之後嘅表現好大分別吓。
最後盧強調，港大百年基業和名聲係幾代人辛勤努力嘅成果，擔心制度一旦崩潰，修復可能唔止另一個百年，希望馮可以循序漸進，為港大解困。
