好多人以為「放生」活動一般喺水上舉行，其實，立法會亦係放生勝地之一，而且唔係放生普通動物，而係「牛鬼蛇神」，令人嘆為觀止。

唔係講笑（o架），壹傳媒老闆淫賤黎去年被踢爆向泛民政黨及人士秘密捐款，其中兩名立法會議員工黨李卓人同社民連梁國雄，被指分別收款一百五十萬及一百萬元而未有向立法會申報，被立法會議員個人利益監察委員會立案調查。當時已經畀人睇死自己人查自己人，最後又係高高舉起，輕輕放下，結果真係冇講錯。

嗱，日前議監會閉門討論有關調查報告，喺三名泛民議員護短下，李卓人及梁國雄被認為有「合理辯解」而獲放生，繼續鬆毛鬆翼。

查實立法會玩放生，都唔係乜嘢新聞咯。喺整個黑金醜聞中，共有五名泛民議員秘密收錢，立法會裝模作樣調查一番，結果公民黨梁家傑同毛孟靜、民主黨涂謹申齊齊被放過，只有李卓人及梁國雄被立案調查，最後又係不了了之。正如古人話齋，不近情者多藏奸，咁爛嘅「捉放曹」橋段，係人都知有問題喇。

真係諗極都唔明，淫賤黎擺明車馬反中亂港，囂張到自己承認有關捐款係用於選舉用途；而無良政客受人錢財替人消災，李卓人更曾將政治黑金「袋住先」長達大半年，可謂證據確鑿。奇就奇在立法會包庇護短，煞有介事做咗場調查騷，浪費公帑都算嘞，仲公然玩包庇，簡直係侮辱市民智慧，仲有天理嘅！

冇辦法啦，立法會呢場大龍鳳根本就係掩人耳目。正如有學者質疑「泛民對自己友無調查得咁盡」，放生自己人已經唔係第一次，早就唔係乜新聞啦。咁又係吖，今時今日政黨利益凌駕於公義之上，政客互相包庇有乜出奇呀。

最諷刺嘅係，泛民政客平日道貌岸然，最鍾意企喺道德高地說三道四，其實根本係「律己以寬，待人以嚴」嘅僞君子。正所謂，物必先腐而後蟲生，立法會被人叫垃圾會，早就藏污納垢，烏煙瘴氣嘅喇。

計太一叮話齋，政客靠得住，豬乸會上樹。議員自甘墮落，狼狽為奸，旨意佢哋主持正義，盞嘥氣嘅咋，始終都要廉署出手，清除牛鬼蛇神。呢，連拖足幾年嘅曾蔭權爵士都已落鑊，證明反腐利劍仲未生銹，仲唔乘勝追擊，快快趣趣將呢啲妖孽繩之以法，省番靚廉署招牌，叮！