公民教育委員會尋日舉行今年度第二次會議，匯報工作進度時話將會搵製作公司拍攝新一輯《心繫家國》宣傳短片，表面上解釋係因為短片早於○九年製作，非高清格式，但睇嚟係為短片「甩轆」補鑊！事關早前有眼利網民發現，《心繫家國》「汗水篇」有部分片段，疑取自美國太空總署太空船一九六九年的升空片段，令歌頌祖國航天太空發展變成歌頌美國航天科技，更被網民嘲諷是「心繫美國」，所以唔係補鑊都無人信啦！

新一輯短片希望反映國家最新發展，仲配合兩年後香港回歸二十周年。委員會未來亦注重推廣國家的「一帶一路」發展，考慮資助青年到涵蓋的內地城市進行考察，會聯同合適機構製作相關的節目及展覽，希望市民對「一帶一路」的認識更為廣闊深入，加深對國家同國民身份嘅認同。委員會又計劃將「尊重法治精神、包容不同聲音」，作為下年度重點推廣的價值，莫非因為去年發生嘅違法佔領行動而定出呢個方針？

第一手消息請下載on.cc東網iPhone/iPad/Android/Windows Phone Apps