政壇：盧寵茂囡囡慘遭網民起底

港大副校長風波滿城風雨，雖法律學院前院長陳文敏嘅任命已被否決，但事件未告一段落。疑喺表決時反對任命陳文敏嘅校委會委員盧寵茂，被網民抨擊及收粗口電郵，就連佢喺外國求學嘅囡囡都被網絡起底。所謂「禍不及妻兒」，網民真係過晒火。

盧寵茂嘅女兒（右一）被網民起底。
（資料圖片）

話說港大學生會早前衝入校委會會議室，期間盧寵茂倒地受傷。網民質疑盧寵茂扮嘢，仲惡搞模仿盧寵茂倒地姿勢影相。港大學生會會長馮敬恩爆料，話盧寵茂否決陳文敏任命係因為不滿陳文敏喺佢上次跌倒後無問候佢，結果網民又發起「＃我問候盧寵茂」行動。

盧寵茂話佢依家一日收逾千電郵，當中更夾雜粗言穢語，估唔到尋日仲有人對佢個女進行網絡起底，貼出佢個女同友人嘅合照，更列出佢個女嘅個人資料，如就讀嘅大學、學系及電話等，連佢個女嘅前男友都被公諸於世。