政壇：胡炎松嘆年輕人唔願加班
今時今日嘅年輕人同以前好唔同，香港潮屬社團總會（總會）會董胡炎松日前出席一個活動，講到呢個問題，佢都好感慨，話新一代打工文化同過往有好大分別，佢有朋友就曾經試過補水叫下屬加班，但就被下屬請食檸檬，個下屬仲話不如畀番錢佢個朋友喎。
胡炎松
常務會董方平就話，以前嘅打工仔非常着重前景同發展，只要有得升職就一定會好開心，有時仲因為想賺多啲錢自動加班，經濟差時，甚至有員工自願減薪，希望唔好被炒魷。但依家工作文化大不同，對於有人寧願辭職都唔想升職，佢都抓晒頭，因為升職通常都同人工掛鈎。至於早排有傳打工仔寧願唔升職件事，方平就估計，有機會係工作量同責任大咗好多，人工又先加得少少，所以出現有人「寧願唔升職」嘅情況。
