政壇：單仲偕或冷手執條「內褲」
自從政改表決甩轆之後，建制派一直想藉搶攻立法會嘅委員會控制權而重振聲威，當中包括上一年度被泛民「偷襲」成功嘅人事編制同工務兩個小組委員會，以及其他十六個事務委員會嘅正、副主席職位。不過，立法會復會在即，建制派嘅口風開始轉軟。據知，因為個別建制派覺得爭嚟無咩意思，拒絕幫手「冧友」，搶攻委員會嘅計劃最終都要擱置，而泛民都有進帳嘅，據講白鴿黨嘅單仲偕好有機會出任副主席，雖然可能被人笑係冷手執條「內褲」（內會副主席），但分到餅仔，仲好過冇呀。
泛民上一個立法年度突襲成功，取得工務同人事編制兩個小組委員會控制權，令建制派方寸大亂。民建聯同經民聯一直主張搶攻番委員會正、副主席位「報復」，不過自由黨同其他獨立建制派就唔係好同意，自由黨仲講明唔會協助「冧友」，應入就入。
憂泛民玩嘢 倡先入28人
據了解，建制最後調整計劃，決定只搶攻重要嘅委員會，好似工務小組、人事編制小組、保安、政制、發展、司法及法律，以及資訊科技及廣播等事務委員會，而次要嘅事務委員會如福利同衞生就留畀泛民。不過，亦有保守啲嘅建制派擔心泛民「玩嘢」，建議都係每個小組先入二十八人，搶咗話事權先，之後先讓出主席之位，以免被「過一戙」。周一建制派退修會後將會有最終定案。
至於內務委員會副主席人選，之前曾經有報道話，建制派唔會接受民主黨單仲偕或者公共專業聯盟梁繼昌兩個泛民議員，唯一人選只有衞生服務界議員李國麟。據知，泛民會議召集人何秀蘭早前同葉國謙會面，表示建制派可以喺單仲偕或者梁家傑之間二擇其一，而建制派普遍屬意單仲偕，認為佢份人較以和為貴。而之前提過嘅梁繼昌根本就不在考慮之列，事關佢只做過一屆議員，未夠班做副主席，加上佢人緣唔好，都無人想佢做囉。
